МУЗЕЙНЫ КОМПЛЕКС ГІСТОРЫІ I КУЛЬТУРЫ АРШАНШЧЫНЫ створаны на падставе рашэння Аршанскага гарвыканкама ад 10.12.1993 г. і Віцебскага аблвыканкама ад 20.04.1994 г. Музейны комплекс з’яўляецца навукова-даследчай і асветніцкай установай культуры, якая выконвае функцыі навуковага, культурна-адукацыйнага, выхаваўчага і метадычнага цэнтра музейнай справы г.Орша і Аршанскага раёна. Асноўнай мэтай комплексу з’яўляецца навуковае камплектаванне, вывучэнне, экспанаванне, захаванне гісторыка-культурнай спадчыны.

Асноўны фонд музейнага комплексу і яго філіялаў (2008) напічвае 28671 адзінку захоўвання, навукова-дапаможны — каля 4 тыс. адзінак. Агульная плошча музейных будынкаў 2106 м², экспазіцыйна-выставачная плошча 1123 м², плошча памяшканняў для захоўвання фондаў 220 м².

У склад комплексу на правах філіялаў уваходзяць: Мемарыяльны музей Героя Савецкага Саюза К.С.Заслонава, Музей гісторыі і культуры г.Орша, Аршанскі этнаграфічны музей «Млын», Музей драўлянай скульптуры разьбяра С.С.Шаўрова і Аршанскі музей У.С.Караткевіча. Музейны комплекс валодае багатай калекцыяй каштоўных матэрыялаў, аб’яднаных у 35 калекцый. Гэта рэдкія і цікавыя прадметы і дакументы, якія адлюстроўваюць шматвяковую гісторыю горада, расказваюць пра гераічныя падзеі, знакамітых людзей Аршаншчыны: пісьменнікаў, паэтаў, навукоўцаў, мастакоў, дзяржаўных дзеячаў.