«АТЭНЭЎМ ВІЛЕНЬСКЕ» («Athenaeum Wilenskie») — гістарычны часопіс, орган Таварыства аматараў навук. Выдаваўся ў 1923-39 гг. у Вільні на польскай мове. Перыядычнасць — ад 4 нумароў у год да аднаго ў 2 гады. У ім асвятлялася гісторыя зямель Вялікага княства Літоўскага, публікаваліся дакументальныя матэрыялы, падрабязная, часта анатаваная бібліяграфія даследаванняў па гісторыі Вялікага княства Літоўскага. Змешчаны даследаванні пра мінулае Беларусі і гісторыю культуры беларускага народа, матэрыялы па гісторыі развіцця рамёстваў: «Майстэрства вырабу гадзіннікаў у Вільні ў XVI і XVII стст.» М.Бранштэйна (1923), «Віленская медальерная школа ў XVI і XVII стст.» М.Гумоўскага (1929), «Аб справе пра нацыянальны і рэлігійны склад цэха ліцейшчыкаў у Вільні» Ф.Доўбека і «Аб справе пра нацыянальны склад віленскіх цэхаў у XVI—XVIII ст.» М.Лаўмянскай (абодва 1930 г.), «Ганчарная тэхніка лепкі на тэрыторыі паўночна-ўсходніх зямель Польшчы паводле матэрыялаў апошніх раскопак» У.Галубовіча, «Славянскія курганныя могільнікі каля вёскі Платава ў павеце і ваяводстве Навагрудскім» А.Галубовіч (абедзве 1938 г.), «Тэорыя і практыка рускіх неўматычных спеваў на аснове традыцыі віленскіх старавераў» Я.Кашмідэр (1935) і інш.