«БАЦЯН» — імправізаваны танец-гульня. Музычны памер 2/4. Тэмп умераны. Выконваўся ў час калядных ігрышчаў жанчынамі і мужчынамі. Выканаўцу пераапраналі ў «бацяна» (бусла): давалі ў рукі качаргу-дзюбу, накрывалі посцілкай; ён падскокваў на адной назе, адначасова размахваў сагнутымі ў локцях рукамі, што нагадвала рухі бусла.
"Бацян". Выконвае жыхарка
вёскі Сіпавічы Браслаўскага раёна Вядомы таксама «бацян» як дзіцячая гульня з прыпеўкай: «Бацян, бацян даўганосы, // Прынясе нам
боты, а сам босы».
У некаторых варыянтах выконваецца без пераапранання, тэкст прыпеўкі зменены: «Бацян кле-кле, // Твая матка ў пекле, // Стаіць на вуліцы // У чырвонай спадніцы». Часам, каб узмацніць уражанне, выканаўца станавіўся на хадулі і рабіў тыя ж самыя рухі, як і без хадуляў, што патрабавала асаблівага майстэрства. Танец зафіксаваны ў Віцебскай вобласці.