БАЙ — казачны персанаж або казачнік; апавядальнік (звычайна дзед з барадою), які займальна расказвае байкі, казкі. Лакальныя назвы баяр, баяшнік, бахар. Сустракаецца бай у калыханках («Баю, бай...»), гульнях («Жаніцьба бахара»), казках: «Быў сабе багаты пан, а любіў ён вельмі слухаць баек і трымаў ва сваім двары баяра» («У якім небе пан быў»); «Вот у цара баяшнік быў — вядома, цар спіць, a баяшнік байкі бае» («Міхей-кравец і Марцін-шавец» ) і інш.