«БАРАДАЙКА» — традыцыйны танец. Музычны памер 2/4. Тэмп хуткі. Выконваўся ранняй вясной на вуліцы або на падворку. Усе выканаўцы браліся за рукі і ланцужком хутка прабягалі скрозь своеасаблівыя «вароты» — пад злучанымі і паднятымі ўгору рукамі хлопца і дзяўчыны, якія стаялі на адным месцы. Часам танцоры беглі так хутка, што ланцужок разрываўся і тыя, хто адарваўся ад яго, каціліся кулём. Выканаўцы, якія стаялі на месцы, час ад часу апускалі рукі перад кім-небудзь з танцораў і такім чынам выхоплівалі з ланцужка выканаўцаў, якія павінны былі стаць з аднаго ці другога боку «варот». У канцы танца ўсе хлопцы і дзяўчаты, трымаючыся за рукі, хутка круціліся ў парах на адным месцы.

У некаторых вёсках «барадайка» меў нязначныя адрозненні, часам бытаваў у выглядзе гульні. Зафіксаваны ў Іванаўскім раёне Брэсцкай вобласці.