БАРЫС I ГЛЕБ — дзень у народным календары (адзначаўся 24 ліпеня старога стыля), у які забаранялася выконваць цяжкія работы: «на Барыса за серп і касу не бярыся». Лічылася, што парушальнікам гэтай забароны пагражала калецтва, a жывёле, якая ела скошанае ў гэты дзень сена, — хвароба і нездаровы прыплод; скіданыя ў гэты дзень стагі маглі быць спалены маланкай, тое ж чакала пуню ці гумно са звезеным у гэты дзень хлебам.

У дзень Барыса і Глеба асцерагаліся дажджу з навальніцай, гэты ж дзень лічыўся апошнім днём купання.