«ГАПАК» – традыцыйны танец; роднасны ўкрінскаму харэаграфічнаму ўзору, але мае прынцыпова адметныя рысы. Лакальныя назвы «Гапачок», «Гапак утрох». У большасці выпадкаў выконваецца ўтрох. Танцоры стаяць адзін побач з адным са злучанымі рукамі далонь у далонь на ўзроўні грудзей.

«Гапак» выконваюць па крузе: танцоры хуткім крокам праходзяць уперад, потым такім жа крокам без развароту ідуць у адваротным напрамку. Найбольш характэрны рух — праход па чарзе тых танцораў, якія стаяць убаку, у «варотцы», створаныя ўзнятымі рукамі двух іншых выканаўцаў. Гэта фігура можа паўтарацца некалькі разоў запар. Асабліва мудрагелістай здаецца яна, калі танцоры, злучыўшы рукі адзін з адным (замкнуты круг), не разрываюць іх да заканчэння танца. Кожная змена фігур у танцы пачынаецца саскокам на абедзве нагі або выкананнем прысядкі. Танец суправаджаецца разнастайнымі прыпеўкамі. У некаторых рэгіёнах выконваецца як імправізаваны танец з неабмежаванай колькасцю ўдзельнікаў. У такім варыянце часта выкарыстоўваецца форма скокаў навыперадкі, суправаджаецца прыпеўкамі. Часам спаборніцтва ў танцы ўключае спаборніцтва ў прыпеўках. Зафіксаваны экспедыцыямі ў Паўднёвай і Паўднёва-Усходняй Беларусі.