КОСІЧ Марыя Мікалаеўна (1850 г., в.Расуха Мглінскага павета Чарнігаўскай губерні — 28 сакавіка 1911 г., там жа), беларуская фалькларыстка, этнограф і пісьменніца. Адукацыю атрымала ў Пецярбургу. У 1901 г. у часопісе «Живая старина» апублікавала працу «Ліцвіны-беларусы Чарнігаўскай губерні, іх побыт і песні», прысвечаную вуснай народнай паэзіі і духоўнай культуры беларусаў (апісанне абрадаў і звычаяў даецца па месяцах і порах года). У прадмове да зборніка характарызуецца жыццё і побыт сялян-беларусаў, іх вераванні, паданні, песні, асаблівасці гаворкі і спеваў.


Пісала пра матэрыяльную культуру беларусаў (артыкул «Аб пабудовах беларускага селяніна Чарнігаўскай губерні...», 1906). Аўтар паэмы «На перасяленне. Расказ цёткі Домны з Палесся» (1903).