КРЫВЯНКА — крывяная каўбаса. Называлі таксама крупянка, кашанка, мучанка.

Робяць крывянку, як колюць кабана і ёсць свежая кроў. Адварваюць крупы (даўней — грэцкія, ячныя, у наш час — і рыс), дадаюць тлушч, скваркі, прыправы, уліваюць кроў. Усё мяшаюць, кладуць (наліваюць) у тоўстыя кішкі, пякуць на бляхах або абварваюць, а потым падпякаюць. Часам крупы сыплюць у кроў сырымі. У Пухавіцкім, Жыткавіцкім раёнах у крывянку дадаюць дробна пасечаныя вантробы. Замест круп у крывянку часам дадаюць муку (Жабінкаўскі, Бярозаўскі, Жыткавіцкі, Лоеўскі, Рагачоўскі раёны). Часам у крывянку дадаюць драную бульбу.

Вядома на Беларусі паўсюдна.