КУРЭНЬ — збудаванне для адпачынку рыбакоў, лесарубаў, якія вялі промысел на значнай адлегласці ад месца жыхарства і затрымліваліся там працяглы час. У ім захоўвалі прадукты харчавання, запасное
адзенне. Рыбакі будавалі курэнь на ўзвышаных берагах непадалёку ад вады. На сошкі, укапаныя ў зямлю, клалі жэрдкі. Па перыметры ўтворанага каркаса прыстаўлялі ўшчыльную адна да адной драўляныя плашкі, калкі, якія пакрывалі сенам і абкладвалі дзёрнам. Формай курэні нагадвалі піраміду або конус.
У курэні было 2 праёмы: адзін збоку, служыў уваходам (пры неабходнасці закрываўся плашкамі), другі ўверсе, для выхаду дыму. Вогнішча пасярэдзіне курэня абмяжоўвалася квадратам, абкладзеным найчасцей каменнем. На зямлі каля сцен рабілі насцілы, на якіх адпачывалі.
Побач з курэнем рыбакі вялілі на жэрдках рыбу, падвешаную да жэрдак; у вадзе знаходзіліся скрыні для жывой рыбы (часам яе трымалі і ў невялікіх азярынках). Падобныя курэні будавалі таксама паляўнічыя, сяляне, што касілі сена на аддаленых ад дому сенажацях.