КУШЛЯНСКАЯ СЯДЗІБА — помнік сядзібна-паркавай архітэктуры 2-й паловы XIX ст. Створаная ў в.Кушляны (Смаргонскага раёна). Гісторыя сядзібы ўзыходзіць да XVIII ст., калі ў 1749 г. маёнтак за 450 злотых набыў А.Багушэвіч (прапрадзед беларускага паэта Ф.Багушэвіча). Уключае сядзібны дом, парк эканамічнага тыпу, гаспадарчыя пабудовы, альтанку. З малых архітэктурных формаў засталася драўляная альтанка (паводле падання, яе збудаваў Багушэвіч з сябрамі ў памяць паўстання 1863 — 1864 гг.), народная назва «Распятая воля». Непадалёк ад сядзібы знаходзіцца камень Мацея Бурачка, усталяваны сялянамі ў гонар паэта ў пачатку XX ст.

Да 1988 г. у сядзібным доме, дзе правёў апошнія гады жыцця паэт-дэмакрат Ф.К.Багушэвіч, знаходзілася Кушлянская сельская бібліятэка імя Багушэвіча. Дом захаваўся дзякуючы шчыраму рупліўцу, захавальніку і вартаўніку сядзібы М.Ляпеху. Да 150-годдзя з дня нараджэння Ф.Багушэвіча рэалізаваны праект рэстаўрацыі сядзібы. У 1990 г. пад час святкаванняў будынку сядзібнага дома была адкрытая літаратурна-мастацкая кампазіцыя, прысвечаная творчасці паэта.