КВАШАНІНА, халадзец, студзень – традыцыйная мясная страва, звычайна са свініны. Лакальныя назвы квашэліна, дрыгва, застудзіны, юха. Свіныя ногі, хвост, часткі галавы (лыч, вушы) чысцяць, мыюць, сякуць на кавалкі, вараць у падсоленай вадзе. Дадаюць моркву, цыбулю, у наш час таксама перац і лаўровы ліст. Вараць доўга, каб мяса ўпарылася і адстала ад касцей. Потым яго вымаюць, выбіраюць з яго косці, рэжуць, дадаюць дробна пакрышаны сыры часнок. Раскладваюць па місках, заліваюць працэджаным булёнам (юшкай) і ставяць у халоднае месца, каб застыла. Пасыпаюць кропам, пятрушкай, перцам, ядуць з хрэнам, гарчыцай. Раней гатавалася на вяселле ды іншыя святы. Вядомая па ўсёй Беларусі.