ЛЕЛЬЧЫЦКІ КРАЯЗНАЎЧЫ МУЗЕЙ заснаваны паводле рашэння Лельчыцкага раённага Савета народных дэпутатаў ад 26.10.1989 г. Адкрыты для наведвальнікаў 01.01.1990 г. Першымі кіраўнікамі былі У.А.Флёрко, Д.С.Жук, Л.У.Астаповіч. У 2007 г. музей узначаліла A.С.Платонава. Асноўны фонд музея (2008) налічвае 1628 адзінак захоўвання, навукова-дапаможны — 1195 адзінак. Плошча экспазіцыі 170 м².
Вялікую каштоўнасць уяўляюць калекцыі этнаграфіі, археалогіі, самавараў ХІХ — ХХ ст., узораў узбраення часоў Вялікай Айчыннай вайны і інш. Экспазіцыя размешчана ў 4 залах. У зале этнаграфіі, экспазіцыя якой уяўляе сялянскую хату, прадстаўлены прадметы побыту, характэрныя для Палесся (кросны, ступы, жорны і інш.), калекцыі ручнікоў, тканых посцілак, вышыванак ХІХ — пачатку ХХ ст., а таксама элементы традыцыйнага палескага касцюма. У зале Вялікай Айчыннай вайны захоўваюцца дакументы і матэрыялы аб партызанскім руху, дзейнасці падполля, злучэннях украінскіх і малдаўскіх партызан, якія дзейнічалі на тэрыторыі раёна, пра воінаў-землякоў, у тым ліку пра Героя Савецкага Саюза М.П.Сыдзько, камандзіра партызанскага атрада І.А.Коласа, камандзіра Лельчыцкай партызанскай брыгады К.М.Дамброўскага і інш. Сярод экспанатаў картасхема партызанскага руху на тэрыторыі Лельчыцкага раёна, карта вызвалення раёна ад нямецка-фашысцкіх захопнікоў, баявыя ўзнагароды.
Экспазіцыя залы гісторыі раёна носіць назву «Мы з вякоў...». У ёй прадстаўлены прадметы (крамянёвыя прылады працы, наканечнікі стрэл ІІІ — ІІ-га тыс. да нашай эры), знойдзеныя пры археалагічных раскопках на тэрыторыі раёна; папяровыя банкноты часоў Расійскай імперыі, карты, на якіх упершыню паказаны населеныя пункты Лельчыцкага раёна; дакументы і матэрыялы пра пасляваеннае аднаўленне і развіццё прамысловасці і культуры раёна.
У зале мастацтва рэгулярна праводзяцца выстаўкі рознай тэматыкі: «Персанажы Пекінскай оперы», «Францыск Скарына і яго час», «Лінія Сталіна», «Палёт фантазіі» і інш. Штомесячна супрацоўнікі музея арганізуюць экскурсіі, музейныя святы, тэматычныя вечары, конкурсы, лекцыі і інш.
Адрас: 247840, Гомельская вобласць, г.п.Лельчыцы, вул.Чырвонаармейская, 1
Тэлефон: 8-(02356)-2-13-23