ЛІТВІН Міхалон (сапраўднае Цішкевіч Міхайла) — беларускі гуманіст і мысліцель XVI ст. У 1538-40 гг. пасол
Вялікага княства Літоўскага да крымскага хана. Aўтар сацыяльна-палітычнага трактата «Пра норавы татараў, літоўцаў і масквіцян» (напісаны каля 1550 г., выданне на лацінскай мове ў 1615 г. у Базелі, што ў Швейцарыі). У ім крытыкаваў дзяржаўны лад, саслоўна-сацыяльныя адносіны ў Вялікім княстве Літоўскім, норавы і паводзіны феадальнай арыстакратыі, духавенства, царкоўныя парадкі. У справе перабудовы грамадска-палітычных адносін заклікаў звяртацца да вопыту суседніх народаў (рускіх, татараў і інш.). У трактаце шмат звестак пра духоўную культуру, лад жыцця, сямейныя адносіны, побыт беларусаў, рускіх, літоўцаў, татараў, украінцаў, палякаў.