«ЛЮСТРА» — традыцыйны танец. У некаторых мясцовасцях называўся «Люстэрка». Захаваў сувязь з карагодам. Музычны памер 2/4. Тэмп жвавы. На Гродзеншчыне ўдзельнікі, узяўшыся за рукі і стварыўшы круг, рытмізаваным крокам беглі то ў адзін бок, то ў другі. Спыняліся для таго, каб саліст, які стаяў у цэнтры, выбраў каго-небудзь з удзельнікаў на сваё месца. Канчаўся танец тым, што выканаўцы павольна сыходзіліся ў цэнтры круга, потым вярталіся на свае месцы і ўздымалі ўгору злучаныя рукі. На Магілёўшчыне «Люстэрка» існавала ў выглядзе карагода, які паступова пераходзіў у танец з пацалункамі і рознымі жартамі. Дзе-нідзе саліст танцаваў імправізавана. Пашырана было «Люстэрка» ў выглядзе фігур кадрылі.