МАГІЛЬНЯНСКАЯ БІТВА 1284 г. паводле беларуска-літоўскіх летапісаў, адбылася каля в.Магільна (Уздзенскі раён Мінскай вобласці) на р.Нёман паміж вялікім князем літоўскім Рынгольдам і кааліцыяй рускіх князёў (Святаславам кіеўскім, Львом уладзімірскім, Дзмітрыем друцкім), якія ў саюзе з татарамі хацелі «знову Литву под ярмо першое... привести».
На баку Рынгольда акрамя літоўцаў удзельнічала і «свая Русь». Бітва працягвалася з ранку да вечара і скончылася на карысць Рынгольда. Кааліцыя рускіх князёў і татар панесла страты ў 40 тыс. чалавек, у палон трапіла 1 тыс. чалавек. Страты войска Рынгольда склалі 700 чалавек забітымі і 200 параненымі.
Іншыя крыніцы не пацвярджаюць існаванне князёў, якія ўдзельнічалі ў бітве. У паданні пра паўлегендарную Магільнянскую бітву адлюстраваліся рэальныя напады татар і паўднёва-рускіх князёў у 13 ст. на
BKЛ.