МЕМАРЫЯЛЬНЫ КОМПЛЕКС САВЕЦКА-ПОЛЬСКАЙ БАЯВОЙ САДРУЖНАСЦІ адкрыты ў в.Леніна Горацкага раёна 15.10.1967 г. паводле рашэння Савета Міністраў БССР да 25-й гадавіны бітвы пад Леніна 1-й польскай дывізыі імя Т.Касцюшкі і 1-га польскага танкавага палка імя герояў Вестэрплятэ ў складзе 33-й арміі Заходняга фронту супраць нямецка-фашысцкіх захопнікаў 12—13.10.1943 г. Мемарыяльным комплексам кіравалі А.С.Фядосенка, Д.М.Лыбзікава, Ю.М.Карпіцкі. З 2008 г. дырэктар У.У.Вараб'ёў.

Мемарыяльны комплекс (архітэктары Я.Белапольскі, У.Хавін, скульптар У.Цыгаль) уключае некалькі аб'ектаў, тэматычна і функцыянальна звязаных паміж сабой: Музей савецка-польскай баявой садружнасці, магілы невядомых савецкага і польскага воінаў (за 1 км на захад ад вёскі) і 2 брацкія магілы савецкіх і польскіх воінаў.

Асноўны фонд музея (2008) налічвае 6254 адзінкі захоўвання, навукова-дапаможны — 1003 адзінкі. Плошча мемарыяльнага комплексу 1814 м², экспазіцыйнай залы — 907 м², фондасховішча — 500 м².

Фонды музея складаюць калекцыі ваеннай формы і аксесуараў, зброі, фотадакументаў, друкаваных выданняў, прадметаў дэкаратыўна-прыкладнога мастацтва. Сярод экспанатаў вымпелы, што выпушчаны ў СССР, ПНР, Беларусі да юбілейных дат. У ліку прадметаў дэкаратыўна-прыкладнога мастацтва 2 вазы, перададзеныя ў дар музею польскімі шахцёрамі г.Катовіцы і польскімі леснікамі, чаканка з выявай марскога судна і надпісам «Для музея бітвы пад Леніна ў сувязі з 40-годдзем Войска Польскага ад працаўнікоў Гданьскай судаверфі». У экспазіцыйнай зале знаходзяцца урны з зямлёй, узятай з месц пахаванняў савецкіх воінаў з 30 гарадоў і ваяводстваў Польшчы.

Дамінантай мемарыяльнага комплексу з'яўляецца Музей савецка-польскай баявой садружнасці, размешчаны на месцы бою з нямецка-фашысцкімі захопнікамі. Перад уваходам у музей устаноўлена стэла, якая сімвалізуе баявую садружнасць: 2 рукі (савецкага і польскага салдат) трымаюць дрэўка баявога сцяга. У аснаванні стэлы надпіс на польскай і рускай мовах «СССР — Польшча 1943». Будынак музея з жалезабетону, шкла і алюмінію ўяўляе сабой купал у выглядзе каскі дыяметрам 34 м, вышынёй 11 м. Пакрыццё зроблена з невялікіх чорных шчытоў, пакладзеных на каркас. Лесвічныя вузлы вылучаны блокамі з барэльефнымі выявамі арла і пяціканцовай зоркі — сімваламі 2 краін. У інтэр'еры музея стэнды з дакументамі і фотаздымкамі, што адлюстроўваюць гісторыю фарміравання і баявы шлях Войска Польскага. У цэнтральнай частцы знаходзіцца дыярама «Бітва пад Ленінам» (мастакі М.Авечкін, А.Інтазараў), у якой паказаны кульмінацыйны момант бою. Побач з музеем знаходзіцца помнік на ўшанаванне памяці загінуўшых савецкіх і польскіх воінаў. У цэнтры ўстаноўлены 3-метровы пагнуты, з прабоінамі і няроўнымі краямі кавалак брані. Побач з ім 2 пліты з надпісамі-прысвячэннямі на польскай, рускай і беларускай мовах. Пляцоўка (9 х 12 м) вакол помніка выкладзена цёмна-чырвоным гранітам, перад ім запалены Вечны агонь. З трох бакоў разбіты газоны, высаджаны дрэвы.

Брацкая магіла 1171 савецкага воіна, якія загінулі ў баях супраць нямецка-фашысцкіх захопнікаў у кастрычніку 1943 г., знаходзіцца на месцы савецкіх баявых пазіцый. На магіле ўстаноўлены блок з чырвонага граніту ў выглядзе пяціканцовай зоркі, з надпісам-прысвячэннем у цэнтры.

Брацкая магіла 502 польскіх воінаў, якія загінулі ў баях супраць нямецка-фашысцкіх захопнікаў у кастрычніку 1943 г., знаходзіцца ў 0,5 км ад брацкай магілы савецкіх воінаў, на месцы польскіх баявых пазіцый. Сярод пахаваных — Героі Савецкага Саюза У.Высоцкі і А.Т.Кжывань. На брацкай магіле ўзведзена сцяна з шэрага граніту (12 х 3 м) з надпісам-прысвячэннем на польскай і беларускай мовах. У цэнтры сцяны на бронзавым картушы ў абрамленні прыспушчаных сцягоў даты бітвы пад Леніна і выявы скрыжаваных лаўровых галінак. Пляцоўка забетаніравана і абсаджана дэкаратыўнымі кустамі.

На базе мемарыяльнага комплексу праводзяцца экскурсіі, урокі мужнасці, прымаюцца дэлегацыі з Расіі, Польшчы і іншых краін.