МОТАЛЬСКІЯ РУЧНІКІ — традыцыйныя тканыя ручнікі, якія вырабляюць ткачыхі ў в.Моталь Іванаўскага раёна. Вядомы з канца 18 ст., у 2-й палове 19 ст. ў Моталі працавалі ткачы-рамеснікі.

Даўжыня мотальскіх ручнікоў звычайна 210 — 240 см, шырыня 30 — 33 см. Ткуць «у елачку» пераборнай тэхнікай у 4 ніты, снуюць у 8 — 10 пасмаў. Традыцыйны колер узораў — чырвоны з чорным (у сучасных таксама з сінім, зялёным). Кампазіцыя ручнікоў 2 відаў: у адным па аснове праходзяць 2 — 3-каляровыя (у сучасных 4-каляровыя) палоскі-«коскі», у другіх — па ўтку шмат каляровых арнаментальных палосак («затканыя беражкамі»), якія перасякаюцца з каляровымі палоскамі асновы. Даўней аснова і ўток былі з ільняных нітак, а ўзор натыкалі горынню; у наш час ручнікі ткуць з ільняных, баваўняных нітак, а ўзор натыкаюць мулінэ, ірысам. Па канцах ручнікоў арнаментальны малюнак («у зубры», «у кветкі», «у лісты», «у жучкі») займае 7 — 8 см. Заканчваюцца традыцыйныя ручнікі карункамі, якія плялі з нітак асновы ўручную (у сучасных карункі вяжуць кручком).