МУРАВАНЫЯ КАНСТРУКЦЫІ – нясучыя і агараджальныя будаўнічыя канструкцыі (падмуркі або фундаменты, сцены, калоны, перакрыцці, аркі, скляпенні і г. д.) з каменных будаўнічых матэрыялаў.

Складаюць канструкцыйныя сістэмы будынкаў і збудаванняў, з’яўляюцца важным канструкцыйна-мастацкім элементам кампазіцыі і часам вырашальным фактарам у стварэнні архітэктурнага вобраза. Робяць з цэглы, каменных і бетонных блокаў, бутавага каменю і інш.

У сучаснай архітэктурна-будаўнічай практыцы ўжываюцца мураваныя канструкцыі, узмоцненыя стальной ці іншай арматурай (аркаменныя канструкцыі).

Гэта адзін з найбольш старажытных відаў канструкцыяў. Атрымалі развіццё ў стоечна-бэлечных канструкцыях (металітычныя збудаванні з каменных глыбаў, сярэдзіна 3-га тыс. да н.э.). У сучаснай архітэктурна-будаўнічай практыцы мастацка-дэкаратыўная якасць мураванай канструкцыі дасягаецца абліцоўкай рознымі відамі аддзелачнага матэрыялу і з прыроднага каменю і абліцовачнай цэглы.