МУЗЕЙ ПАРТЫЗАНСКАЙ СЛАВЫ — філіял Івацэвіцкага гісторыка-краязнаўчага музея. Заснаваны ў 1971 г. ва ўрочышчы Хаваншчына, за 3 км на поўдзень ад в.Карочын Івацэвіцкага раёна, дзе ў 1943-44 гг. базіраваліся Брэсцкія падпольныя абкомы КП(б)Б і ЛКСМБ, штаб Брэсцкага партызанскага злучэння, рэдакцыя і друкарня падпольнай газеты «Заря».

Асноўны фонд (2008) налічвае больш за 980 адзінак захоўвання. На тэрыторыі музея знаходзяцца 4 драўляныя домікі, 2 зямлянкі, калодзеж, «лясная школа». У доміках разгорнута экспазіцыя, якая распавядае пра дзейнасць падпольных абкомаў, штаба злучэння, барацьбу моладзі супраць нямецка-фашысцкіх захопнікаў, работу рэдакцыі газеты, партызанскага шпіталя і інш. Прадстаўлены фотадакументы і друкаваныя выданні, прадметы партызанскага побыту.