МУЗЕЙ «РУЖАНСКІ ПАЛАЦАВЫ КОМПЛЕКС САПЕГАЎ». У 2008 г. рашэннем Пружанскага райвыканкама пачата першая чарга рэстаўрацыі гісторыка-культурнай каштоўнасці Рэспублікі Беларусь Ружанскага палацавага комплексу Сапегаў. У снежні 2010 г. скончана рэстаўрацыйная праца па аднаўленні ўсходняга флігеля і брамы, пасля чаго было вырашана на базе палацавага комплексу адчыніць музей з мэтай фарміравання гістарычнай самасвядомасці грамадзян, забеспячэння культурна-камунікацыйных, адукацыйных і дасугавых патрабаванняў насельніцтва.

З 25 студзеня 2011 г. ва ўсходнім флігелі афіцыйна працуе выстава і экспазіцыйная зала, прысвечаная дзейнасці рода Сапегаў. У 2011 г. музей наведалі 18 тысяч чалавек, прачытаны 9 лекцый на гісторыка-культурную тэматыку, арганізаваны 4 выставы (работы членаў Саюза мастакоў Рэспублікі Беларусь, графіка Б.Ц. Богшы).

На канец снежня 2011 г. скончаны асноўныя будаўнічыя работы ў заходнім флігелі. У адноўленым будынку створана экспазіцыя, прысвечаная гісторыі мястэчка Ружаны — галоўнай рэзідэнцыі рода Сапегаў, помнікам архітэктуры Сапегаўскага часу, а таксама экспазіцыйная зала "Гасціная канцлера”, дзе ў інтэр’ерах XVII — XVIII стст. праводзяцца тэатралізаваныя гістарычныя рэканструкцыі, што мелі дачыненне да гісторыі Ружанскага палацавага комплексу Сапегаў.