«МУЖЫЦКАЯ ПРАЎДА» («Muzyckaja prauda»)Галоўная »
«МУЖЫЦКАЯ ПРАЎДА» («Muzyckaja prauda») — нелегальная рэвалюцыйна-дэмакратычная, першая на беларускай мове газета (друкавалася лацінкаю), якую выдавалі ў 1862 — 1863 гг. К.Каліноўскі з Ф.Ражанскім, В.Урублеўскім, паводле некаторых звестак, з С.Сонгіным.
Выйшла 7 нумароў. Першы нумар надрукаваны ў канцы чэрвеня — пачатку ліпеня 1862 г. Да канца 1862 г. выйшла яшчэ 5 нумароў. Сёмы нумар выпушчаны ў 1863 г. Асобныя нумары перадрукоўваліся паўторна (крыху адрозніваліся ад папярэдніх). Выдавалася невялікім фарматам, але значным тыражом, распаўсюджвалася амаль па ўсёй Беларусі, а таксама на тэрыторыі сучасных Літвы і Латвіі. Кожны нумар падпісваўся псеўданімам «Яська — гаспадар з-пад Вільні». У выданні заўважаецца пэўны план, кожны нумар прысвячаўся якой-небудзь праблеме грамадскага жыцця. Усе нумары прасякнутыя найважнейшым пытаннем эпохі — пытаннем зямлі і волі. Выкрывала грабежніцкі характар сялянскай рэформы 1861 г., антынародную палітыку царызму, заклікала беларускі народ да ўзброенай барацьбы супраць самадзяржаўна-прыгонніцкага ладу, наказвала тое агульнае, што было ў становішчы і мэтах беларускага, рускага i польскага народаў, заклікала беларускіх сялянаў падтрымліваць польскі нацыянальна-вызваленчы рух. Мова «Мужыцкай праўды» народная, эмацыйная, вобразная, з трапнымі параўнаннямі, фальклорнай сімволікай. Газета стаіць у вытоках публіцыстычных жанраў новай беларускай літаратуры, яна ўзбагаціла літаратурную мову новымі паняццямі, плённым досведам.
Крыніца: «Краязнаўчая газета» № 47 (496) снежань 2013 год |