НАЦЫЯНАЛЬНЫ ГІСТАРЫЧНЫ МУЗЕЙ РЭСПУБЛІКІ БЕЛАРУСЬ з’яўляецца галоўным музеем гістарычнага профілю ў нашай краіне. Гісторыя музея бярэ пачатак ад 1957 г., калі была створана арганізацыйная група па адкрыцці Беларускага дзяржаўнага гісторыка-краязнаўчага музея.

У 1964 г. музей атрымаў назву Дзяржаўны музей БССР, а праз 3 гады адкрылася першая экспазіцыя. У 1992 г. музей перайменаваны ў Нацыянальны музей гісторыі і культуры Беларусі, а ў 2009 г. атрымаў назву Нацыянальны гістарычны музей Рэспублікі Беларусь.

У зборы музея налічваецца 377918 музейных прадметаў, размеркаваных па 48 калекцыях: археалагічнай, этнаграфічнай, каштоўных металаў і камянёў, скарбаў, зброі, рукапісных і старадрукаваных кніг, дакументаў, выяўленчага мастацтва, нумізматыкі, нацыянальнага касцюма і інш.

Храналагічны дыяпазон калекцый ахоплівае перыяд ад першабытнай эпохі да сучаснасці. Шэраг прадметаў са збору Нацыянальнага гістарычнага музея Рэспублікі Беларусь уключаны ў Дзяржаўны спіс гісторыка-культурных каштоўнасцей Рэспублікі Беларусь. Музей мае 2 філіялы: Дом-музей I з’езда РСДРП і Музей сучаснай беларускай дзяржаўнасці (адкрыўся 22 чэрвеня 2012 г.).

За 2011 г. музей наведалі 174 тысячы чалавек. Апошнім часам музей праводзіць мэтанакіраваную працу па камплектаванні і прэзентацыі фондаў з прыцягненнем спонсарскіх сродкаў.