НАЦЫЯНАЛЬНЫ ГІСТОРЫКА-КУЛЬТУРНЫ ЗАПАВЕДНІК «НЯСВІЖ» быў утвораны 2 ліпеня 1993 г. на базе помнікаў гісторыі і культуры горада Нясвіж. 22 мая 1997 г. ён атрымаў статус музея-запаведніка.

Цэнтральнае месца ў структуры ўстановы займае Палацава-паркавы ансамбль, які рэпрэзентуе гісторыю роду Радзівілаў, палацавай архітэктуры і інтэр’ераў магнацкай рэзідэнцыі XVI – пачатку XX стст. У экспазіцыі гарадской ратушы прадстаўлена гісторыя гарадскога самакіравання і гандлёва-рамесніцкага жыцця Нясвіжа XVI – XIX стст. У 2005 г. "Архітэктурны, жылы і культурны комплекс рэзідэнцыі роду Радзівілаў у Нясвіжы" ў складзе Палацава-паркавага ансамбля і Комплексу былога кляштара езуітаў XVI – XIX стст. быў унесены ў Спіс Сусветнай спадчыны ЮНЕСКА.

Гарадская ратуша з гандлёвымі радамі і гарадская Слуцкая брама з’яўляюцца гісторыка-культурнымі каштоўнасцямі Рэспублікі Беларусь першай катэгорыі.

Сярод праектаў музея-запаведніка апошніх гадоў вылучаюцца серыя сумесных тэатральных і музычных мерапрыемстваў у межах акцыі "Нясвіж – культурная сталіца Беларусі-2012", штогадовы фестываль опернага і балетнага мастацтва "Вечары Вялікага тэатра ў замку Радзівілаў". Музей-запаведнік разгортвае шырокую міжнародную дзейнасць. 3 апошніх дасягненняў: удзел у Міжнародным фестывалі музеяў "Інтэрмузей-2012", арганізацыя Міжнароднага семінара ЮНЕСКА "Аб’екты сусветнай спадчыны: захаванне і выкарыстанне ў мэтах устойлівага развіцця". За 2011 г. музей-запаведнік наведала больш за 210 тысяч чалавек. Агульная колькасць адзінак захоўвання на пачатак 2012 г. – 5651, з іх 1623 адзінкі – у экспазіцыі.