НАВУКОВА-ТЭРМІНАЛАГІЧНАЯ КАМІСІЯ (НТК)Галоўная »
НАВУКОВА-ТЭРМІНАЛАГІЧНАЯ КАМІСІЯ (НТК) — навукова-даследчая ўстанова пры Наркамасветы БССР. Існавала ў 1921 — 1922 гг. Створаная паводле пастановы ЦВК БССР у лютым 1921 г. (зацверджаная СНК БССР 10 лютага 1921 г.) у складзе гуманітарнай (літаратурна-мастацкай), прыродазнаўчай і матэматычнай секцыяў. Старшыня С. Некрашэвіч; загадчык гуманітарнай секцыі Янка Купала (люты — жнівень 1921 г.).
Займалася складаннем і апрацоўкай беларускай тэрміналогіі. Адбылося каля 70 пасяджэнняў, распрацавана амаль 3 тыс. тэрмінаў па граматыцы, логіцы, алгебры, арыфметыцы, геаметрыі, заалогіі і інш. Тэрміны ў выглядзе спецыяльных падборак друкаваліся ў часопісе «Вестник Народного комиссариата просвещения».
Пры выпрацоўцы тэрміналогіі камісія арыентавалася на слоўнік жывой беларускай мовы і ўтварала неалагізмы паводле правілаў беларускай мовы, часам выкарыстоўвала запазычанні з рускай, польскай і лацінскай моваў. Большасць распрацаваных тэрмінаў захоўваецца ў сучаснай беларускай мове. Камісіяй падрыхтаваныя і выдадзеныя некалькі падручнікаў для пачатковых і сярэдніх школаў. На яе базе 30 студзеня 1922 г. заснаваны Інстытут беларускай культуры (Інбелкульт).
Крыніца: «Краязнаўчая газета» № 24 (521) чэрвень 2014 года |