«ОРШАНСКИЙ ВЕСТНИК» — штотыднёвая грамадска-палітычная газета. Выдавалася на рускай мове ў Оршы з сакавіка 1915 г. па сакавік 1918 г. Асвятляла ўнутранае і міжнароднае становішча, падзеі на франтах Першай сусветнай вайны.

У паведамленнях «Сярод беларусаў» (19.07.1917), «Беларускія спектаклі» (29.07.1917) і інш. інфармавала пра беларускі нацыянальны рух, выступленне ў Оршы Першага таварыства беларускай драмы і камедыі. Друкавала лірычныя і прыродаапісальныя вершы, апавяданні і нарысы мясцовых аўтараў, пераважна вучнёўскай моладзі (Т. Жалязнякоў, А. Луцэт, В. Вячаслаўскі). Крытыкавала безыдэйны рэпертуар буржуазнага кінематографа.