ПАДАБЕДАВЫ — сям'я беларускіх і рускіх музыкантаў і акцёраў XVIII — XIX стст.

Карніла — беларускі прыгонны музыкант XVIII — XIX стст. Нарадзіўся ў Шклове. Прыгонны графа С.Г. Зорыча, іграў у аркестры Шклоўскага кадэцкага корпуса. У 1800 г. прададзены ў Гродна за даўгі Зорыча.

Міхаіл Карнілавіч (?, Шклоў — 10.06.1837) — беларускі і рускі скрыпач і альтыст. Сын Карнілы. Прыгонны музыкант нашчадка Зорыча Ф. Чарноевіча. 3 1824 г. на службе ў пецярбургскіх тэатрах, адзін з найлепшых музыкантаў прыдворнага аркестра. У 1833 г. страціў зрок і быў звольнены.

Іван Карнілавіч (?, Шклоў — 20.11.1860) — беларускі і рускі саліст-віяланчэліст, альтыст, педагог. Сын Карнілы. Прыгонны Чарноевіча. У 1827 г. адпушчаны на волю. 3 гэтага часу 33 гады працаваў у тэатрах Пецярбурга першым салістам-віяланчэлістам. 3 1834 г. адначасова выкладаў у тэатральнай школе, з 1838 г. навучаў музыцы выхаванцаў Паўлаўскага кадэцкага корпуса. За бездакорную службу ў 1849 г. удастоены ганаровага патомнага грамадзянства.

Надзея Іванаўна (1838, Пецярбург — ?) — руская артыстка драмы. Дачка Івана Карнілавіча. 3 11 гадоў у трупах імператарскіх тэатраў.

Кацярына Іванаўна (1839, Пецярбург — ?) — руская артыстка драмы. Дачка Івана Карнілавіча. 3 1859 г. у пецярбургскіх тэатрах. На думку сучаснікаў, Надзея і Кацярына былі «адораныя надзвычайнымі талентамі і з поспехам выконвалі першыя ролі ў драмах, камедыях і вадэвілях».