ПАДПРУЖНАЯ АРКА — апорная канструкцыя перакрыцця, што ўспрымае нагрузку скляпення або купала і перадае яе на слупы, сцены, пілястры, лапаткі, контрфорсы; від канструкцыйнай аркі.

Бываюць пераважна паўцыркульныя і спічастыя (у гатычных збудаваннях). Падпружныя аркі расчляняюць скляпенне на шэраг квадратных або прамавугольных у плане ўчасткаў, з'яўляюцца адным з элементаў рытму і маштабу ў інтэр'еры. У некаторых пабудовах падпружныя аркі дэкараваныя лепкай, кесонамі, арнаментальна-дэкаратыўнай размалёўкай.