ПАВЕЛ РУСІН З КРОСНА [1470 (?), г. Кросна, Польшча — 1517] — паэт-лацініст, гуманіст. Вучыўся ў Кракаўскім і Грэйфсвальдскім (Памеранія) універсітэтах. У 1499 г. атрымаў ступень бакалаўра, у 1506 г. магістра вольных мастацтваў. У 1506 — 1516 г. прафесар Кракаўскага ўніверсітэта.

Сярод яго вучняў сярэдневечны літаратар, паэт-лацініст Ян Вісліцкі (аўтар эпічнай гістарычнай паэмы «Пруская вайна», 1515), якому ён прысвяціў хвалебную элегію. Аўтар зборніка паэтычных твораў (1509). Выдаваў творы старажытна-рымскіх пісьменнікаў з сваімі вершаванымі і празаічнымі прадмовамі: А. Персія Флака (1508), Л. Сенекі (1513).