ПЛЯТЭР Эмілія Францаўна (13.11.1806 год, Вільня — 23.12.1831 год) — беларуская фалькларыстка. Жывучы ў сваякоў на Віцебшчыне, збірала і апрацоўвала беларускія народныя песні. Віртуозна валодала жанрам галашэнняў, выконвала на фартэпіяна народныя мелодыі, захаплялася беларускай харэаграфіяй, сама танцавала народныя танцы («лепятуха»). Спрабавала пісаць беларускія вершы, у тым ліку стылізаваныя пад народныя галашэнні («Авой, авой, дзяцюк ты мой»).

Удзельніца паўстання 1830 —  1831 гадоў у Польшчы, Беларусі і Літве. Паплечніца А.Ф. Рыпінскага па канспірацыі. Пераапрануўшыся юнаком, удзельнічала ў баях з царскімі войскамі. Прататып гераіні верша Адама Міцкевіча «Смерць палкоўніка» (1832), апетая ў многіх творах літаратуры і мастацтва. Імем Эміліі Плятэр называўся жаночы батальён у дывізіі Войска Польскага (сфармаваны ў 1943 годзе).