ПЛЫТАГОНЫ, плытнікі, сплаўшчыкі — рабочыя на плытах. У розных басейнах рэк плытагоны мелі мясцовыя назвы: гоншчыкі, лаўнікі, асначы, бальнікі, плысакі і іншыя.

Партыю плытоў гнала арцель, на чале якой быў старшы плытагон — атаман, караваншчык, корнік, ротман, стырнік. Назвы гоншчык, лаўнік, корнік характэрныя для Віцебшчыны, ротман, флісак, арэль — для Гродзеншчыны, караваншчык — для Усходняга Палесся, пасаўнік, бальнік, плысак — для Заходняга Палесся. Назва сплаўшчыкі бытавала на землях Беларусі паўсюдна.