ПРЫЗБА — насып уздоўж ніжняй часткі зруба хаты для засцярогі яго ад вільгаці і для ўцяплення памяшкання.

Найбольш простая прызба — прысыпка зямлёй ці пяском двух ніжніх вянцоў. Больш дасканалая і пашыраная — з калкоў, убітых у зямлю на адлегласці 35—40 см ад сцяны і пераплеценых лазой або бярозавымі пруткамі, ці з укапаных слупкоў, за якія закладвалі тонкае бярвенне, дошкі, гарбылі. Вядомыя прызбы і з укапаных слупоў з пазамі, у якія закладвалі бярвенне, дылі. Прызбы былі невысокімі, зрэдку іх насыпалі да акна. Прызбы засыпалі зямлёй, часцей пяском, кастрыцай.

У наш час будынкі ставяцца на падмурку, фундаменце і прызбы не робяцца.