ВАРАПАЕЎСКІ КАСЦЁЛ СВЯТОГА АРХАНГЕЛА МІХАІЛА размяшчаецца ў гарадскім пасёлку Варапаева Пастаўскага раёна Віцебскай вобласці. Пабудаваны ў 1991—96 гг. з цэглы намаганнямі мосарскага ксяндза прэлата Ю.Булко на месцы папярэдняга драўлянага храма 1930-х гг.

Твор архітэктуры постнеагатычнага стылю. Вырашаны прамавугольным у плане аб'ёмам пад пакатым двухсхільным дахам. Па цэнтры фасада далучана двух'ярусная чатырохгранная шатровая вежа-званіца, трохвугольны франтон крапаваны стральчатай аркатурай. Фасады расчлянёны прамавугольнымі аконнымі праёмамі з трохвугольнымі сандрыкамі. Уваход накрыты двухсхільным казырком на кранштэйнах.