ВЕРХАЎЛЯНСКАЕ СВЯЦІЛІШЧА, Верхаўляны – этнаграфічны аб'ект і, верагодна, помнік язычніцкага культу каля в.Верхаўляны Бераставіцкага раёна. Аналагічны свяцілішчам, выяўленым на Смаленшчыне і ў Паўночнай Вукавіне (служылі месцамі маленняў, ахвярапрынашэнняў і адначасова грамадскімі цэнтрамі акругі).

Уяўляе сабой узгорак з круглай пляцоўкай (дыяметрам каля 7 м), акружанай ровам (глыбіня 1,5 — 2 м) і валам (вышыня 3 — 7 м), уваход з захаду. Пры раскопках у рове выяўлена каменная выбрукоўка, перакрытая культурным пластам з касцямі жывёл і вуголлем, пад ёй — ранняя кераміка (зробленая на ганчарным крузе), што дазваляе аднесці помнік да эпохі Старажытнай Русі. На пляцоўцы (на глыбіні каля 0,2 м) таксама выяўлена вуголле і абломкі ранняй керамікі. Магчыма, на пляцоўцы ў старажытнасці размяшчаўся ідал або ахвярнік, роў таксама меў рытуальнае значэнне — тут гарэлі вогнішчы. Помнік адкрыты Ф.П.Пакроўскім у канцы 19 ст., раскопкі вёў Э.М.Зайкоўскі ў 1986 г.