"ЗАВІВАННЕ БАРАДЫ" – старажытны ўсходнеславянскі
абрад, які спраўляўся ў канцы жніва.
Жнеі пакідалі некалькі нязжатых каласоў, вырывалі ў гэтым месцы траву, клалі туды кавалачак хлеба з соллю, надломлівалі нязжатыя сцябліны, скручвалі іх з хлебам і ахіналі на зямлю. Паводле даўняга павер'я, гэта трэба было рабіць для зерневых духаў, якія павінны быць удзячныя і паспрыяць ураджаю на наступны год. Зерневага духа ўяўлялі ў выглядзе казла, таму пакінутую збажыну называлі «барадой казла».
Абрад суправаджаўся прымаўкамі і дажынкавымі песнямі, якія мелі вясёлы характар.