«ЗОЛАТА» — гульня. Лакальныя назвы «Цурка», «Кальцо». Удзельнікі садзіліся кругам або ў рад. Вядучы ў далонях трымаў «золата» (пярсцёнак, манету, цукерку) і імітаваў перадачу яго ў працягнутыя злучаныя далоні астатніх удзельнікаў, прыгаворваючы: «Я з кута іду, золата нясу. Угадайце, баяры, дзе золата ззяе». Адзін з удзельнікаў павінен быў адгадаць, у каго засталося «золата». Калі адгадваў, садзіўся на яго месца.

Сучасныя запісы вядомы пад назвай «Шкута».