9 снежня ў Нацыянальнай бібліятэцы Беларусі прайшла прэзентацыя электроннага выдання «Спадчына акадэміка
Яўхіма Карскага: да 150-годдзя з дня нараджэння». Яно ўключае біяграфічны нарыс, дакументы з 6еларускіх архіваў, артыкул галоўнага бібліёграфа НББ Л.Сільновай пра кнігазбор акадэміка, каталог кніг з аўтографамі, электронныя копіі рукапіснага інвентару кнігазбору і асобных прыжыццёвых выданняў навукоўца.
Праўнук акадэміка А.Карскі, які браў удзел у прэзентацыі, падрыхтаваў для дыска бібліяграфію навуковых працаў свайго продка і літаратуры пра яго, апісанне эпісталярнай спадчыны акадэміка. Да імпрэзы была прымеркаваная і адмысловая выстаўка, арганізатарамі якой выступілі НББ, Дэпартамент па архівах і справаводстве Міністэрства юстыцыі Рэспублікі Беларусь, Нацыянальны архіў Рэспублікі Беларусь, Санкт-Пецярбургскі філіял Архіва Расійскай акадэміі навук пры ўдзеле Нацыянальнага гістарычнага архіва Беларусі, Беларускага дзяржаўнага архіва-музея літаратуры і мастацтва, Дзяржаўнага архіва Гродзенскай вобласці, Дзяржаўнага архіва грамадскіх аб'яднанняў Гродзенскай вобласці і Беларускага дзяржаўнаго архіва кінафотафонадакументаў. У экспазіцыю выстаўкі ўвайшлі ўнікальныя выданні з асабістага кнігазбору акадэміка, што асобнай калекцыяй з 1922 г. зберагаецца ў бібліятэцы. Ён налічвае блізу дзвюх з паловаю тысячаў экзэмпляраў і з’яўляецца каштоўным гістарычным зборам літаратуры па славяназнаўстве. Многія кнігі маюць дарчыя надпісы, пазнакі і запісы Я.Карскага.
Фота з нашчадкамі акадэміка - на памяць
Асабісты архіў акадэміка зберагаецца ў Санкт-Пецярбургскім філіяле архіва Расійскай акадэміі навук, які прадставіў на выстаўку ўнікальныя дакументы, сярод якіх фотаздымкі, біяграфічныя матэрыялы, рукапіс успамінаў жонкі акадзміка С.Карскай, нататнікі за 1918-1919 гг., старонкі 1-га тома «Беларусаў» з праўкамі і ўстаўкамі аўтара, лісты беларускіх навукоўцаў і пісьменнікаў. Прадстаўленыя і раней невядомыя дакументы з беларускіх архіваў – кліравыя ведамасці са звесткамі пра бацьку акадэміка, праграмы лекцыяў акадэміка па беларускай мове і літаратуры ў Мінскім педагагічным інстытуце, дакументы аб удзеле ў падрыхтоўчай працы па стварэнні Беларускага дзяржаўнага ўніверсітэта і іншыя.
