Напрыканцы 2010 года ў выдавецтве «Вышэйшая школа» выйшлі дзве кнігі нашага славутага земляка-вучонага — фалькларыста, этнографа, мовазанаўца і літаратара Аляксандра Казіміравіча Сержпутоўскага: «Русальная нядзеля. Прымхі і забабоны беларусаў-палешукоў» і «Гняздоўе белых буслоў. Казкі і апавяданні беларусаў-палешукоў».

Першая кніга, «Русальная нядзеля. Прымхі і забабоны беларусаў-палешукоў», ўяўляе сабой найбольш поўны сярод існуючых збор фальклорных матэрыялаў — легенд, паданняў, прымхаў, замоў, народных апавяданняў, рытуяльных абрадаў, запісаных А.К.Сержпутоўскім. Яны даюць яскравае ўяўленне аб светапоглядах беларусаў-палешукоў, дазваляюць раскрыць творчую ролю народа ў стварэнні духоўных каштоўнасцей, прасачыць за тым, які ўплыў аказвала і аказвае беларуская народная творчасць на развіццё славянскай фалькларыстыкі.

У другой кнізе, «Гняздоўе белых буслоў. Казкі і апавяданні беларусаў-палешукоў», змешчаны лепшыя ўзоры народнай казачнай прозы. Запісы і назіранні аўтара А.К. Сержпутоўскага, якія даюць шырокую карціну жыцця сялян дарэвалюцыйнага Беларускага Палесся, раскрываюць іх культуру, палітычныя і філасофска-эстэтычныя погляды, знаёмяць з лепшымі беларускімі казачнікамі.