Капліца размяшчаецца ў паўночна-заходняй частцы вёскі. Пабудавана ў 1830-я гады з цэглы як пахавальня ўладальнікаў сядзібы Абуховічаў. Помнік архітэктуры неакласіцызму. Вырашана лапідарным прамавугольным у плане аб'ёмам пад стромкім двухсхільным дахам. Плоскасныя фасады пазбаўлены архітэктурнага дэкору, апяразаны карнізам простага профілю, прарэзаны арачнымі аконнымі і ўваходнымі праёмамі. Пад капліцай сутарэнне пад цыліндрычным скляпеннем. Капліца ўключана ў Дзяржаўны спіс гісторыка-культурных каштоўнасцей Рэспублікі Беларусь пад шыфрам 113Г00029.