АГАРОДЖА, агарожа, загарад, загарадзь, загародка, загарадка, загарада, абгародка, плот, паркан, тын, частакол, мур, пляцень, плетнік, жардзянік, штыкетнік, жываплот усё гэта мае адну загараджальную функцыю, але выканана з рознага матэрыялу і мае рознае прызначэнне. Агароджай абносіцца будынак, аддзяляецца вуліца ў горадзе і ў вёсцы, уся сельская сядзіба, пэўны аб'ект, доступ да якога староннім не рэкамендуецца, могільнік і асобныя магілы і г. д.

Агароджа бывае з цэглы альбо цагляных слупкоў і металу, з жалезных, драўляных ці металічных слупоў і з дошчачак (парадны бок), з абкораных жэрдачак-калкоў, густа пераплеценых галін ці дубцоў (каб у агарод не лазілі куры). Свая агароджа (адгарода) у гаспадарчых памяшканнях. Для дэкаратыўнага аздаблення робяць агароджу ў скверах і парках, узбоч вуліц, на дачах з густых кустоў, нават з кветак ці іншай расліннасці. Бывае, на той жа дачы сёй-той можа сімвалічна адгарадзіцца ад суседа нацягнутым шнуром ці ўбітымі ў зямлю па кутах свайго ўчастка кійкамі, выкладзенымі каменнямі. Свая «агароджа», мяжа, скажам, на спартыўных палях і пляцоўках, на шашы і дарогах у размечаных лініях.