АСВЕЙСКАЯ СЯДЗІБА – помнік палацава-паркавай архітэктуры 2-й паловы XVIII стагоддзя. Пабудавана ў Асвеі Верхнядзвінскага раёна. У ёй былі палац, капліца, сад, пейзажны парк (плошча 15 га) з
аранжарэямі, сажалка,
брама.
Палац Шадурскіх (руіны)
У цэнтры кампазіцыі – 2-павярховы мураваны палац анфіладнай планіроўкі (пабудаваны ў 1782 г. у стылі класіцызму, знішчаны ў 1914-м, засталіся руіны) з паўкруглымі бакавымі крыламі, злучанымі з галоўным аб'ёмам аркадамі, якія ўтваралі авальны партэр перад галоўным заходнім фасадам. Манументальнасць архітэктуры будынка ўзмацнялася буйным маштабам чляненняў і канструкцый. Рытм фасадаў ствараўся чаргаваннем высокіх арачных і прамавугольных аконных праёмаў і здвоеных калон тасканскага ордэра ў прасценках; пластыку сцен ўзбагачалі антаблементы, рустыка, філёнгі. Палац абкружалі
каналы і сажалкі з дэкаратыўнымі масткамі і штучнымі астравамі, аб'яднаныя з возерам Асвейскае ўадзіную водную сістэму. Пераважаюць мясцовыя пароды дрэў.