БЮСТ (з франц.) – пагрудная выява-партрэт чалавека, што вядома з часоў Старажытных Егіпта і Грэцыі, а пасля Старажытнага Рыма. На Беларусі гэтыя скульптурныя помнікі вядомыя з XVII ст. (М.К.Радзівілу ў фарным касцёле ў Нясвіжы).

У XIX – пачатку XX стст. скульптары Р.Слізень, В.Бубноўскі, В.Смакоўскі стварылі шэраг бюстаў дзеячаў культуры Беларусі і Літвы. У савецкі час беларускімі скульптарамі створана вельмі шмат бюстаў дзеячаў рэвалюцыйнага руху і савецкіх кіраўнікоў, герояў грамадзянскай і Другой сусветнай войнаў, перадавікоў вытворчасці, а таксама вядомых беларускіх дзеячаў культуры, мастацтва і навукі – Цёткі (А.Пашкевіч), Я.Купалы, Якуба Коласа, Максіма Багдановіча, К.Крапівы і інш.