ГРОДЗЕНСКІЯ КАРАЛЕЎСКІЯ МАНУФАКТУРЫ дзейнічалі ў 2-й палове XVIII ст. у Гродзенскай, Брэсцкай эканоміях па ініцыятыве А.Тызенгаўза. У іх было 21 прадпрыемства.
У 1766-м г. заснавана «Кампанія шарсцяных мануфактур», буйнейшая з іх была ў Гарадніцы, дзе меліся прадзільнае, ткацкае, ваяльнае, стрыгальнае, варсаванае і фарбаванае аддзяленні; прадзільні з нямецкімі і галандскімі верацёнамі, 40 ткацкіх станкоў і інш.
Гродна стала буйным цэнтрам мастацкага ткацтва на Беларусі (вырабляліся
дываны, шаўковыя, «літыя» паясы). На розных мануфактурах вырабляліся дарагія экіпажы і збруя, ніткі, ордэны, галуны, ювелірныя вырабы, жалезныя цвікі, іголкі. Кіравалі рознымі мануфактурамі кваліфікаваныя майстры, у тым ліку з Заходняй Еўропы і Расіі.
Пасля 1780 г. многія прадпрыемствы пачалі зведваць шматлікія фінансава-матэрыяльныя цяжкасці.