АЛЯХНІЦКАЯ КАПЛІЦА размяшчалася на могілках вёскі Аляхнішкі Пастаўскага раёна Віцебскай вобласці.

Пабудавана ў пачатку 20 ст. з драўлянага бруса. У капліцы быў пахаваны інжынер-тэхнолаг Ян Манчынскі (памёр 06.05.1912 г., навешана мемарыяльная дошка). Разабрана.

Твор народнага дойлідства. Была вырашана прамавугольным у плане зрубам («у ластаўчын хвост») пад двухсхільным дахам (не захаваўся). 3 тыльнага боку была прырублена пяцігранная апсіда са стральчатым уваходным праёмам у бакавую сакрысцію. Вертыкальна ашаляваныя сцены были прарублены прамавугольнымі ўваходным і аконнымі праёмамі, умацаваны брусамі-сцяжкамі.

Крыніца: Кулагін А. М. Каталіцкія храмы Беларусі: Энцыкл. даведнік / А. М. Кулагін;
фатограф А. Л. Дыбоўскі. — 2-е выд. — Мн.: БелЭн, 2008.— 488 с.: іл.