«АНТОН» — традыцыйны танец. Лакальная назва «Антошка». Музычны памер 2/4. Тэмп умераны. Ёсць меркаванні, што ён узнік на аснове старажытнага «хаджэння з казой». Танцы і ігравыя сцэнкі, што разыгрываліся «казой», суправаджаліся песнямі пра Антона, Антоніху і ўпартую казу.

У адным з варыянтаў выканаўцы, узяўшыся за рукі, кружыліся то ў адзін, то ў другі бок; у другім — салісты імправізавалі ў цэнтры круга, ішлі ўпрысядкі. Танец зафіксаваны ў Мінскай, Магілёўскай, Віцебскай абласцях.