АПАРТАМЕНТЫ (ад франц. appartement кватэра) — група жылых і дапаможных пакояў, звычайна на адным паверсе, выдзеленых у адзін комплекс для пражывання пэўнай асобы.

У беларускім сядзібна-палацавым дойлідстве вядомы з 16 ст. ў будынках шляхты і магнатаў, дзе існаваў падзел на жылую і парадную ці гаспадарчую палавіны. Жылая палавіна аддзялялася ад астатніх частак дома сенцамі. Прасцейшы варыянт апартаментаў аб'яднаныя ў адзіны блок жылое памяшканне і адна ці некалькі камор.

У 16 — 17 ст. вядомы і больш складаныя паводле планіроўкі апартаментаў, у якія ўваходзілі жылыя пакоі, алькеж, каморы, дадатковыя сенцы і г. д. (в.Ішкалдзь Баранавіцкага, в.Грозава Капыльскага раёнаў, г.Паставы).

У багатых палацах 17 — 19 ст. апартаменты мелі больш складаную будову памяшканняў, яны часам займалі цэлы паверх (г.п.Наваельня Дзятлаўскага раёна, г.Камянец).

У 2-й палове — 19 — 20 ст. прынцып стварэння асобных апартаментаў выявіўся ў секцыйных, блакіраваных і інш. дамах.