АСВЕЙСКІ КЛЯШТАР МІСІЯНЕРАЎ размяшчаецца каля парку на ўсходняй ускраіне гарадскога пасёлка Асвея Верхнядзвінскага раёна Віцебскай вобласці. Пабудаваны ў 18 ст. з цэглы. Заснаваны ў першай палавіне 18 ст. мінскім ваяводам Янам Аўгустам Пльзенам. Паводле іншых звестак, існаваў у 1784 — 1842 гг. Будынак выкарыстоўваецца пад медыцынскую ўстанову.

Помнік архітэктуры барока. Кляштарны корпус П-падобны ў плане, аднапавярховы. Плоскасныя фасады расчлянёны прамавугольнымі аконнымі праёмамі. Планіроўка цэнтральнага крыла калідорная, бакавых — галерэйная. Калідоры перакрыты цыліндрычнымі скляпеннямі з распалубкамі, сутарэнні — цыліндрычнымі, келлі — плоскай столлю.