БЯРОЗАВІЦКІ КАСЦЁЛ СПАСЛАННЯ СВЯТОГА ДУХАГалоўная »
БЯРОЗАВІЦКІ КАСЦЁЛ СПАСЛАННЯ СВЯТОГА ДУХА размешчаны ў горадзе Бярозаўка Лідскага раёна Гродзенскай вобласці.
Пабудаваны ў 1992 г. з цэглы. Парафія зацверджана ў 1928 г. дэкрэтам віленскага біскупа Р.Ялбжыкоўскага. Папярэдні касцёл быў пабудаваны ў 1931 г. з цэглы на сродкі шклозавода, у 1932 г. асвячоны, у 1953 г. закрыты і зруйнаваны (пабудаваны рабочы інтэрнат). Намаганнямі вернікаў і ксяндза А.Стапыры, ахвяраваннямі з Польшчы 07.06.1992 г. асвячоны вуглавы камень і пачата будаўніцтва касцёла, скончанае ў 1993 г. 18.08.2001 г. асвячоны біскупам А.Дзям'янкам; пабудавана капліца, пастаўлены крыж, добраўпарадкавана тэрыторыя.
Твор архітэктуры неаготыкі. Крыжовы ў плане храм з крыламі трансепта, апсідай, нартэксам-званіцай. Асацыяцыі з сярэдневяковай готыкай выклікаюцца лапідарнасцю аб'ёмаў, суровай плоскаснасцю фасадаў, выкладзеных цэглай і члянёных высокімі арачнымі вокнамі, высотнай дамінантай чатырохграннай званіцы, аркатурай галоўнага фасада, стромкасцю чарапічных дахаў.
Крыніца: Кулагін А. М. Каталіцкія храмы Беларусі: Энцыкл. даведнік / А. М. Кулагін; фатограф А. Л. Дыбоўскі. — 2-е выд. — Мн.: БелЭн, 2008. — 488 с.: іл.
|