БОЧКА ВІЛЕНСКАЯ — даўняя мера сыпкіх рэчываў на Беларусі і ў Літве. Паводле пастановы сейма Вялікага княства Літоўскага (1766) раўнялася 406,54 л, прыблізна адпавядала 19 пудам пшаніцы, 18 пудам жыта, 15 пудам ячменю, 10 пудам аўса. Пасля далучэння Беларусі да Расіі прыведзена ў суадносіны з рускімі мерамі, дзялілася на 4 чвэрці (карцы), 8 асьмін, 16 шаснастак, 72 гарцы вялікія, 144 гарцы малыя (глядзіце Гарнец).