ДАМАВІК, хатнік, гаспадар – вобраз у старадаўніх павер’ях беларусаў і іншых народаў. На Беларусі яго ўяўлялі ў выглядзе старога чалавека ў белай вопратцы, з сівой барадой і доўгімі валасамі, які жыў у хаце (пад печчу ці за печчу – падпечнік, запечнік) або ў сенцах, каморы, клеці.

Паводле павер’яў у кожнай хаце (сям’і) быў свой дамавік (увасабляў памерлага гаспадара – апекуна патрыярхальнай сям’і), які нібыта ахоўваў дом, маёмасць, клапаціўся пра гаспадарку (запальваў агонь, прасушваў збожжа ў клеці, даваў корм коням), назіраў за сямейным побытам, а тых, хто быў вінаваты ў сямейных сварках, нядбайна вёў гаспадарку, караў (шкодзіў жывёле і інш.). Прымхлівыя людзі імкнуліся задобрыць дамавіка: у памінальныя і святочныя дні яго гукалі да стала, "частавалі" лепшымі стравамі, звярталіся з просьбай, каб не рабіў шкоды.

Рэлігійнае значэнне вобраз дамавіка страціў у канцы 19 – пачатку 20 ст. і знайшоў адлюстраванне ў беларускім фальклоры (пераважна ў былічках).